Somalia & Turkiya oo saxaafada la hadlay iyo Heshiis dhex maray Wasaaradaha Gaashaandhiga [Sawirro]

Labada Madaxweyne ee dalalka Turkiya iyo Soomaaliya ayaa shir jiraa’id ku wada qabtay Magaalada Ankara ee dalka Turkiya ka dib Kulan Saacado qaatay oo labada Madaxweyne ku yeesheen Aqalka Madaxtooyada dalkaasi.

Dr. Xasan Sheekh Maxamuud iyo Abdalla Guul ayaa Saxaafada u sheegay in ay ka wada hadleen Xiriirka Labada dal, Arrimaha Siyaasada iyo Amaanka, iyadoona Madaxweynaha Jamhuuriyada Federalka Soomaaliya Xasan Sheekh Maxamuud uu warfidiyeenada u sheegay in dhigiisa dalka Turkiya Abdalla Guul uu balan qaaday in ay xoojin doonaan Taageerada.

Dhinaca kale Wasiirada Gaashaandhiga dalalka Soomaaliya iyo Turkiya ayaa Heshiis ku saxiixday Magaalada Ankra ee dalka Turkiya Heshiiskaas oo ka gedisan heshiisyo hore oo dhex maray labada dal, iyadoona kani uu qeyb ka yahay Hindisaha ee Dowlada Soomaaliya ku hormarineeso Ciidamada Qalabka sida iyo Wasaarada Gaashaandhiga.

Saxiixa Heshiiskaan ayaa Waxaa goob joog ka ahaa Wasiiro ka tirsan Dowlada Turkiya, Soomaaliya, Madaxweynaha yaasha labada dal, Taliyaha Ciidamada Xooga Soomaaliya, Kan Turkiya, Agaasimaha Ciidamada Nabadsugida Soomaaliya iyo Madax kale oo ka tirsan Dowlada Turkiya.

Madaxweynaha dalka Soomaaliya Dr. Xasan Sheekh Maxamuud ayaa sidoo kale booqasho ugu tagay Ardey Soomaaliyeed oo dalka Turkiya wax ka barata gaar ahaan kuwo wax ka barta Magaalada Ankara, iyadoona Booqashadaas ay ku wehliyeen Madax ka tirsan Dowlada Turkiya, Wasiirada Arrimaha Dibada Soomaaliya, Gaashaandhiga, Maaliyada, Taliyaha Ciidamada Xooga iyo dhamaan Wafdiga Soomaaliya ee booqashada ku jooga Turkiya.

Sidoo kale Madaxweynaha waxa uu booqasho ku tagay Xarumo kala gedisan oo ay ka mid tahay Xarunta Gaashaandhiga dalka Turkiya.

Maalinta Barrito ayaa lagu wadaa in Madaxweynaha Jamhuuriyada Federalka Soomaaliya Dr. Xasan Sheekh Maxamuud uu booqasho ku tago Magaalada Istanbuul ee dalka Turkiya halkaasi uu ku qaabili doono Ra’iisul Wasaaraha dalka Turkiya Mr. Erdogan.

Kulanka dhex mari doona Madaxweynaha Soomaaliya iyo Ra’iisul Wasaaraha Turkiya ayaa waxaa wehlin doona kulamo ay Istanbuul ku yeelan Doonaan Wasiirada Arrimaha Dibbada Soomaaliya iyo Turkiya, Wasiirada Maaliyada Soomaaliya iyo Turkiya.iyadoona Wafdiga Soomaaliya ay booqasho ku tagi doonaan Xarumo caan ah.