Faallo: Garoonka Diyaaradaha Ee Sayid Maxamed Cabdule Xasan Taleex.

Qof kasta oo reer SSC ah kuna nool qurbaha ayay shalay u ahayd maalin indhahoodu ku doogsadeen muuqaal aad u qurux badan oo quluubtooda si weyn u soo jiitay ka dib markay xaqiiqsadeen in tacabki Khaatumo State ee yagleelka garoonka diyaaradaha ee loogu magac daray Sayid M C Xasan noqday mid si nabdoon u soo cago dhigto diyaarad xambaarsanayd madaxdhaqameedkoodi iyo madaxdoodi ku sugna Xamar.

Ammin aad farax iyo raynrayn leh ba dhalisay in qurbejoog badani u hanqal taagaan sadcaal hor leh oo lagu booqdo dalki hooyo lagana dego gegida caasimadda Taleex lagu askumay. In badan oo jeclayd booqashada dalka aya caqabad weyni ku ahayd ka degista garoonada labada maamul ee hagardaamada shacabkooda ku hayay.

Waxa intaas sii dheer Buuhoodle International Airport oo isna bilahan foodda innagu soo haya noqon doona mattaanka labaad ee carriga Khaatumo diyaaraduhu ku adeegaan. Waa xaqiiq in culays xooggan laga qammaaay waxase weli inbadani is weydiin doonaan dhawr su’aalood oo ah:

1.      Ma la heli doona khayr qabe ama khayr qabayaal u hawlgala diyaarad u adeegta qurbejoogta oo shaqaysa hal duulimaad asbuuc kasta, kana soo qaada Jabuuti X Taleex X Jabuuti, Iyadoo Jabuutina looga soo dhoofi doona via Dubai.

2.      Haddii la helo Khayr qabayaashaas iyo hawlgelinta duulimaadyada, Ma la heli doona rakaab kaafiya?

3.      Haddii la waayo rakaab kaafiya, Ma la heli doona kaabayaal kale? Sida adeeg badeecad tijaaradeed ama deeq bixiyeyaal?

Waxan aaminsanahay sida looga dhabeeyay dhammaystirka garoonka in looga dhabayn karo adeeg duulimaad oo joogto noqda, lana heli karo xirfado kaabe u noqda. Haddaba cid kasta oo reer Khaatumo ah waxa laga codsanaya inay xoogga saaraan ka midho dhalinta kabista adeega iyo dhaqan gelintiisa.

Mahadsanidin