Diyaarado Dagaal oo Joog hoose kuduulaayo oo Hareeyay Hawada Somaliland Saacadihii Ugu Danbeeye

Dayuurado milatari, isla markaana aan hayb-tooda dalka iska leh iyo ujeedadooda midna la garaneynin ayaa 24-kii saacadood ee ugu dambeeyay joog hoose ku gaaf wareegayay degaanada buuraleyda gobolka Saaxil, sida dad ku sugan degaankaasi ay sheegeen, iyagoo intaa ku daray in guuxooda iyo soo cabsi badan ku abuurgtay.

Sidoo kale diyaaradahan aan ujeedadooda la aqoonin ayaa meelaha ay aadka u gaaf-wareegayeen illaa shalay duhurkii illaa xalay waxaa ka mid ahaa deegaanada degmadda Sheekh ee gobolka Saaxil oo ay wakhtiyo aad iskugu dhowdhow ku soo noqnoqonayeen, isla markaasna aysan jirin cid ka warqabta sababta dhabta ah diyaaradahaasi keentay inay dul duulaan degaankaasi.

Sidoo kale mas’uuliyiin ka tirsan maamulka Somaliland oo ka howlgala degmadda Sheekh ayaa xaqiijiyey in diyaaradahaas aan la garaneyn meesha laga leeyahay, hase ahaatee loo badaniyo inay yihiin kuwo ay leeyihiin sirdoonka dalalka reer galbeedka gaar ahaan dalka Ingiriiska oo isagu dhawaan soo saaray warbixin ka dhan ah amniga Somaliland, isla markaasna xusay inay ka cabsi qabaan weeraro is-miidaamin ah muwaadiniintooda lagula beegsado gudaha Somaliland.

Wararka deegaankaas laga helayo ayaa sidoo kale sheegaya in diyaaradahaas la garan waayey ay ka tirsan yihiin shirkado kuwa shidaalka sahamiya ah, isla markaasna degaankaas ka baaraya shidaal iyo qeybaha kala duwan ee Macdanta. si kasta ha ahaatee xukuumadda Somaliland ayaan iyadu ilaa hadda ka hadlin diyaaradahaa la sheegay inay gaaf-wareegayaan buuralayda gobolka Saaxil, waxaana warkan qoray wargeyska haatuf ee ka soo baxa magaalada Hargeysa.