Magaalada Boosaaso oo Maanta Aas Qaran Loogu Sameeyay Nabaddoon Caan ahaa oo Shalay Kooxo Hubaysan ay ku Dileen Gudaha Magaaladaas.

Iyadoo Maalinimadii shalay Bartamaha Magaalada Boosaaso ee Maamulka pontland lagu Toogtay Sulddaan Muuse Faarax oo ka tirsan isimada gobolkaas ka soo jeeda ayaa Maanta waxaa magaaladaasi ka dhacay Aas qaran oo Sulddaanka loogu sameeyay Boosaaso.

Aaska loo sameynayay Sulddaanka ayaa waxaa ka soo qayb galay Isimo aad u fara badan, Siyaasiin, wax garad iyo qaybaha Bulshada ku dhaqan Magaalada Boosaaso oo uu ka mid ahaa Madaxweynihii hore ee Maamulka Pontland Gen. Cadde Muuse.

Mas’uuliyiin ka tirsan Maamulka Gobolka oo halkaas ka hadashay ayaa si kulul u canbaareeyay Dilka loo gaystay Sulddaanka iyagoona sheegay in arrintaas lagu daba jiro maamulkuna uu ka qaadi doono Tallaabada ku habboon.

Mas’uuliyiintii ka tirsaneed maamulka oo halkaa ka hadashay ayaa sheegay inaan marnaba loo dul qaadanayn in Dad la iska Dilo Cadaaladana laga baxsado iyagoona ku hanjabay in kuwii ka danbeeyay Dilkaas Cadaaladda la hor Keeni doono.

Madaxweynaha Maamulka Pontland Cabdiraxmaan Faroole ayaa maalintii shalay Tacsi u diray Eheladii uu Sulddaanka ka Geeryooday isagoona wacad ku maray in Maamulkiisu wax ka qaban doono falalka Dilalaka ah ee ka dhaca Degaanada uu maamulkaaso ka Taliyo.

Banaan Bax Caro leh oo saaka la damacsanaa in laga dhigo Magaalada Boosaaso ayaa baaqsaday ka gadaal markii Mas’uuliyiinta maamulkaasi ay ku baaqeen inaan wax banaan bax la qaban isla markaana la ilaaliyo ammaanka.

Xafiiska War Qabadka Kismaayo 24.ee Muqdisho.