Shirkadda Turkish Airlines oo markii ugu horeysay qiratay war bixin dheer.

Shirkadda diyaaradaha dalka Turkiga ee lagu magacaabo Turkish Airlines ayaa shaaca ka qaaday in ay jiraan dad Soomaali ah oo iyagoo isticmaalaya baasabooro been abuur ah ku safray diyaaraddaas ay  uga sii  gudbaan qaarada Yurub inteeda kale.

Afhayeen u hadlay Shirkadan Turkish Airlines Merve Oruc  ayaa sheegay in ay dhacaan kiisaska ku saabsan dadka baasaboorrada aan saxa ahayn ku safraya ee raacayo diyaaradooda, isagoo tilmaamay in waaxda socdaalka Soomaaliya ay kala shaqeynayaan sidii arrintan wax looga qaban lahaa.

Gen Cabdullaahi Gaafow Maxamuud taliyaha laanta socdaalka iyo jinsiyadaha ee Soomaaliya ayaa dhawaan sheegay in ay dhibaato ku hayaan dadka baasaboorrada been abuurka wata kuwaas oo meel kasta lagu arkay.

Sidoo kale Mas’uuliyiin Soomaaliya  ayaa arintaan  walaac ka muujiyay sii socoshada falalka noocaan ah oo keeni kara in ay Turkish Airlines joojiso duullimaadka ay ku tagto Muqdisho iyo Turkiga.

Mr. Merve Oruc  ayaa waxa uu  xaqiijiyay in aysan shirkadoodu u qorsheysneyn inay  joojinyaan duullimaadka Turkiga iyo Soomaaliya.

Dhawaan ayay ahayd markii uu Jeneraal Gaafoow sheegay in kooxaha dadka tahriibaya ay Muqdisho ka billaabeen in ay baasaboorro been abuur ah u sameeyeen dadka magangalyo doonka ah ee raba in ay Yurub galaan, arrintaas oo uu xusay in ay dhibaato xooggan ku heyso Dawlada soomaaliya sidoo kale arinkaasi aan loo dulqadan doonin lagana hor tagi doono.