XOG: Guddoomiye Cusub oo Lagu Wado In Loo Magacaabo Gobolka Hiiraan Iyo Buuq Ka Dhex Taagan Beelaha Gobolka

Muqdisho (RBC) Sida Raxanreeb ay u xaqiijiyeen ilo wareed ku dhow wasaaradda arrimaha gudaha waxaa guddi wasiiro iyo xildhibaano ah oo loo saaray ka soo talabixinta arrimaha maamulka gobolka Hiiraan oo beryahan khilaafaad uu ka taagnaa ayaa soo gudbiyey talo ku aadan shakhsiga loo magacaabayo maamulka gobolka Hiiraan.

Warqad ay gudbiyeen guddigaasi uuna taageeray wasiirka arrimaha gudaha ayaa lagu soo jeeday in Cabdi Faarax Laqanyo loo magacaabo guddoomiyaha cusub ee gobolka Hiiraan, waxaana haatan laga sugayaa in madaxweyne Xasan Sheekh Maxamuud uu saxiixo wareegtadaasi magacaabista maamulka gobolka Hiiraan.

Cabdi Faarax Laqanyo ayaa ah aqoonyahan ku noolaa dalka Ingiriiska, wuxuuna dhowaan soo gaaray magaalada Muqdisho.  Cabdi wuxuu adeer u yahay Cabdikariin Laqanyo oo ahaa safiirkii Soomaaliya ee wadanka Ethiopia oo sanadkii 2009 lagu dilay qaraxii ismiidaaminta ee ay ku dhinteen dad uu ku jiray wasiirkii amniga qaranka Cumar Xaashi Aadan kaasoo ka dhacay magaalada Beledweyne.

Magacaabistan soo shaacbaxday ee Cabdi Faarax Laqanyo ayaa durba buuq ka dhex abuurtay beelaha ku wada nool gobolka Hiiraan.  Waxaa maalintii shalay shir jaraa’id oo ay qabteen waxgarad iyo siyaasiyiin mid ka mid ah beelaha gobolka Hiiraan ay ku baaqeen in madaxweynuhu ka fiirsado magacaabista Laqanyo.

Sidoo kale waxgarad iyo xildhibaano ku sugan magaalada Muqdisho oo xalay la hadlay Shabakada Raxanreeb ayaa wasaaradda arrimaha gudaha iyo madaxtooyada ka codsaday in shir wadatashi ah loo qabto dhammaan beelaha gobolka Hiiraan ka hor inta aan lagu deg degin magacaabista guddoomiye gobol.

Guddoomiyihii hore ee gobolka Hiiraan C/fataax Xasan Afrax ayay dawladu ka qaaday xilkii ka dib markii bulshada reer Hiiraan ay ku eedeeyeen tacadiyo iyo xadgudubyo ay ka mid yihiin dilal dad rayid ah loo geystay oo uu ka galay bulshada gobolka Hiiraan taasoo abuurtay in qabiilada gobolkaasi wada dega ay colaad isu qaadaan.

Ma jirto war rasmi ah oo ka soo baxay madaxtooyada iyo wasiirka arrimaha gudaha, waxaana magacaabistan hadda dibadda timid ee guddoomiyaha gobolka Hiiraan ay timid xilli wasaaradda arrimaha gudaha awood buuxda loo siiyey inay maamulo u dhisto dhammaan gobollada dalka.

RBC Radio

Use Facebook to Comment on this Post