Al-jaabiri oo dhakhaatiirtii Maxjarkiisa iyo shaqaalaha Geel-jiidka Dekedda Berbera u raray Muqdisho iyo Maareeyaha Dekedda oo la tacaalaya

Xukuumadda oo ka gaabisay samaynta Qorshe ay Dekedda Berberi isaga xejiso Tartanka Dekeddaha Jaarka ah

Berbera(Waaheen)Maal-qabeenka Carbeed ee Maxjarka Berbera Saleebaan Al-jaabiri ayaa u horseeday talaabo fool xun Dhakhaatiirta Maxjarkiisa iyo Geel-jiidka Dekedda Berbera kuwaasoo uu u qaaday Maxjar cusub oo uu ka sameeyay Muqdisho iyo Dekedda Muqdisho.

Talaabadan ayaa Horseeday in ay shaqaale badan oo ka mid ah Dhakhaatiirta Berbera iyo Geel-jiidka ka rara Dekedda Berbera u hanqal taagaan inay iyana u hanqal taagaan sidii ay Muqdisho u tagi lahaayeen, kadib markii ay shaqaalaha uu hore u qaaday Al-jaabiri suuqa soo galiyeen in lagu qaatay lacag farabadan.

Talaabadan oo aad Berbera loogu sheekaysanayo ayaa la sheegay in uu Maareeyaha Dekedda Berbera markii uu ka war helay ku talaabsaday in uu shaqaalaha Dekedda Shiriyo si uu uga hor istaago Qorshahaas ku furmay isagoo ka cabsi qaba in ay Shaqaale kale ka daba tagaan juwa Hore.

Lama oga Qorshaha uu ku baajinayo Maareeyaha Dekedda Berbera Eng: Cali Xoor Xoor haddiiba ay jiraan shaqaale hiyi kacsan oo ay hayso Laydha mushaharka loogu sheegay Muqdisho qaar ka mid ah shaqaalihiisu, hase yeeshee waxa la soo sheegay in uu shir albaabadu u xidhan yahay la yeeshay qaar ka mid ah Madaxda Waaxyaha kala duwan ee shaqaalaha Dekedda.

Sida uu ku soo waramayo Wariyaha Waaheen ee Berbera Cabdilaahi Hussien Cismaan waxa uu Maareeyuhu ka cabsi qabaa inay saamayso arrintani shaqaalaha Kaxeeyay Cagacagafyada Kalmarta iyo Liftarada, kuwaasoo hawsha ugu muhiimsan ka haya Dekedda wakhtiyadda Rarka iyo Dajinta ee ay Dekeddu camiran tahay.

Shaqaalaha Dekedda Berbera ayaa cabasho ka muujiyay Mushaharka ay qaataan sida uu ku soo waramayo wariyuhu waxaanay u sheegeen qaar ka mid ah oo uu la kulmay inay qaataan toddoba Boqol iyo Konton kun oo Shilling Somaliland ah, halka uu sheegay kuwa Dekedda Muqdisho loo qaadanayo in Mushahar ahaan ay u helayaan Kun iyo Toddoba Boqol oo Dollar ($1700).

Si kasta ha ahaatee Xukuumadda Somaliland ooh ore u balanqaaday in ay Korodhsiimo dhan boqolkiiba Sadex boqol ku samayn doonto Mushaharka shaqaalaha ayaa kordhisay 100%, halka 200% labadii boqol ee kale aanay wali soo hadal qaadin, taasoo saamayn ku yeelanaysa  shaqaalaha la hiyi kicinayo maadaama aanu ku filnayn Mushaharka ay qaataan.

Dekedda Berbera ayaa ah Hawl bawlaha Dhaqaale ee Dalka, waxaana lagula jaraa Dagaal iyo tartan hoos loogu dhigayo qiimaheeda, wallow ay Xukuumadda Madaxweyne Siilaanyo sanadkii hore ee 2012-kii ku balanqaaday Siyaasadeeda Miisaaniyadda inay Suuq u raadin doonto si ay ula tartanto Dekeddaha Jaarkeeda ah, waxa muuqata inaanay hawshaasi u fulin sidii looga fadhiyay.