Hay’adaha Amaanka oo Qabtay Suudaaniyiin iyo Somali dadka Tahriibin jiray

Waxa lagu qabtay Baasaabooro Foojari ah iyo Dhokumantiyo kale

Hargeysa(Waaheen)-Laamaha Amaanka Somaliland ayaa gacanta ku dhigay laba todobaad ka hor Koox la sheegay inay ka mid yihiin shabakadaha dadka  Tahriibiya oo isku xidhan sida la sheegay Somaliland ilaa Dalka Suudaan.

Kooxdan oo isugu jirta Suudaaniyiin iyo Somali, ayaa la sheegay in lagu qabtay Baasaabooro Foojari ah iyo dhikumantiyo kale oo ka mida waxyaabaha ay isaga Gooshaan dalalka ay ka shaqaystaan ee Afrika, dhikumantiyadaasoo sida la sheegay ay Hay’adaha amaanku ka shakiyeen ka dibna soo qabqabteen ragaasi.

Saraakiil ka mida Hay’adaha amaanka Somaliland ayaa Wargeyska Waaheen u sheegay in dabayaaqadii todobaadkii ina dhaafay Maxkamadda Gobolka la geeyay Ragan loo haysto, inay ka mid yihiin Kooxaha Tahriibta dadka ku shaqaysta, waxaana la sheegay in Maxkamaddu xadhig rumaan ah oo ay Hay’adaha Dambi baadhistu dalbadeen ku riday.

Inkasta oo Rumaanka Maxkamadda la tibaaxay inaan rasmi loo ridin, isla markaana mudada uu yahay aan la ogayn, laakiinse  waxa sheegay in lagu xadiday mudada ay Dambi Baadhsitu soo dalbatay, iyadoo ilo-wareedyo ku dhaw-dhaw laamaha Cadaalada iyo Amaanka ay sheegeen  in maalmaha soo socda dib Maxkamadda loo horkeeni doono.

Ragan oo tiradooda lagu sheegay ilaa sideed, ayaa lagu qab-qabtay hawl-galadii amaanka kor loogu qaadayay ee beryahanba ka socday, waxaana lagu tuhunsanyahay oo loo haystaa inay ka mid yihiin Kooxo isku-xidhan ilaa dhawr wadan oo dadka Somalida ah u fududeeya Tahriibta ay ugu baxaan Dalalka dibada iyagoo sii maraya Jidka dheer ee Somaliland ilaa dalka suudaan oo ay uga sii gudbaan dhinaca Liibiya.