Askarigii Ilaalada Madaxtooyadda ee ay RRU-du la baxday Habeenimadda oo khilaaf abuuray

Ma dhabaa in Guddi baadha Kiiskiisa loo saaray; wakhti dadkii lala xidh xidhay Ooda laga qaaday, isna wali sii dhex fadhiyo xabsiga markii danbi lagu waayay?

Hargeysa(Waaheen) warar u dhuun daloola Xukuumadda ayaa shaaca ka qaadaya in Askari ka tirsan Ciidanka Ilaaladda Madaxtooyadda oo ay Ciidamadda RRU-du Gurigiisa ku weerareen uu diiday inuu xabsiga ka soo baxo kadib markii la sheegay in Kooxihii isla mar  Guryahooda iyo Meheradahooda loogu daatay la sii daayay.

Cali Caagane oo sida la sheegay ah Askari ka tirsan Ciidanka ilaalada Madaxtooyadda, gaar ahaana ah Dirawalka Taliyaha Ciidankaasi ayaa la sheegay xadhigiisu inuu sababay in Guddi loo saaro maadaama tuhunkii loo qabtay lagu waayay, isla markaana ay Ciidanka RRU-du si ka baxsan Asluubta Ciidanimo ula dhaqmeen markii ay qabanayeen isagoo isku sheegay inuu ka mid yahay Ciidanka Madaxtooyadda.

Guddida loo saaray lama garanayo Ujeedada loo magacaabay hase yeeshee warar aanu ka helnay dad ka ag dhaw ayaa sheegay inuu diiday Saldhiga Koodbuur oo uu ku xidhan yahay inuu ka baxo , kadib markii lagu wargeliyay in danbigii loo soos qabtay lagu waayay. Askariga ayaa la sheegay inuu Dalbaday in Mag-dhaw laga siiyo Sumcad xumada iyo khasaarihii isaga iyo Qoyskiisaba laga galay.

Taliyaha Ciidanka Booliiska Somaliland C/laahi Fadal Iimaan iyo Wasiirka Wasaaradda Arrimaha Gudaha ayaa Af-ka ka xidhay inay ka hadlaan Hawlagalada Ciidanka RRU-du ka wadaan Magaalooyinka Dalka, kuwaasoo ay cabashooyin farabadani Saxaafadda ka soo gaadhayaan Qoysaska ay waxyeeladdu ka soo gaadhay ama Dadkooda la xidh xidhay. Waxaanay dhawr jeer oo aanu isku daynay inaanu wax ka weydiino nooga jawaabi waayeen Telefoonadooda Gacanta, maadaama aan si kale loo helaynin.

Ciidamadda RRU-da iyo SPU-DA ayaa marar badan iyagoo bartilmaameed ka dhiganaya inay baadi goobayaan Argagixiso waxay Hawl-galo aan loo miidaan dayin ku galalafaan Guryo ay Dad maati ahi joogaan kuwaasoo ay ka mid yihiin Guryo ay si fudud macluumaadka ay doonayaan uga heli lahaayeen, balse waxa ay ka door bidaan Hawl-galo marka danbe Fashil ku dhamaada.