Xukuumadda Oo Xoriyadoodii U Soo Celisay Dad Ciidamada Amaanku U Xidheen Tuhuno Argagixisanimo

“Intii aanu xidhnayn jidh dil ayaa lanagu sameeyayay oo  inaanu kaadino ayaa lanoo diiday”Mid Ka Mid Ah Dadka soo daayay

Hargeysa (Waaheen) – Ciidamada amaanka Somaliland, ayaa xoriyadoodii u soo celiyay ku dhawaad 24 qof oo afartii habeen ee u dambeeyay loo qabqabtay tuhuno argagixiso, kuwaasi oo ku kala xidhnaa saldhigyada booliska ee Magaalada Hargeysa.

Dadkan oo u badan dhalinyaro, ayaa siyaabo kala duwan ciidamada amaanku uga soo qabteen xaafadaha Magaloyinka Hargeysa qaarkood, siiba degmooyinka Maxamuud Haybe iyo Axmed-dhagax oo ciidamada amaanku hawlgallo amaanka kor loogu qaadayey ka sameeyeen, ayaa xoriyadoodii loo soo celiyey shalay ka dib baadhitaano lagu sameeyay, inkasta oo dadkan oo Waaheen la hadlay ay sheegeen inaan waxba la waydiin isla-markaana aan loo sheegin sababta loo xidhay midna.

Dadkan oo dhamaantood rag ah isla-markaana muddooyin kala duwan xidhnaa, ayaa qaarkood sheegeen in markii la xidhay lagu sameeyay jidh dil, ilaa 24 saacadoodna loo diiday inay kaadi u baxaan, balse aan wax la xidhiidha sababtii loo xidhay aan la waydiin.

Dadkan ayaa ka sheekeeyay sida loo qabtay iyo siyaabaha ciidamada amaanka ee qabtay ay ula dhaqmeen mudadii ay hayeen “Waxa la igu xidhay saldhiga Ibraahim Koodbuur, waxaana I xidhay dad aanan garanayn oo wejiga soo duubtay, ayaa aniga iyo afar qof oo meherada ila joogay na qabtay oo beerka dhulka noo saaray, 8 saacadood ayaanu meel dhaxan ah fadhinay, saddex cishana waxaanuna ku xidhnayn jeel cidlo ah, maanta (shalay) ayaa lana soo daayey, waxaanuna ahayn 24 qof, saldhigyada Magaalada ayaa lanoo qaybiyey wax allaale iyo wax lanagu haystayna lanooma sheegin” sidaa waxa yidhi Cabdikariin Haaruun Maxamed oo ka mid ah dadka xoriyadoodii loo soo celiyay oo u waramay Waaheen shalay galinkii dambe oo la soo daayay, waxaanu intaa ku daray “Intii aanu xidhnayn waalana jidh-dilay oo waa lana camaajureeyay, silsilado ayaa lanu xidhay oo 42 saacadood ayaa xitaa inaanu kaadino lanoo diiday.”

Fu’aad Maxamed Cabdi oo isna ka mid ahaa dadka soo loo daayay ayaa yidhi “Anigu waxaan xidhnaa muddo afar cisho ah, waxa la iga soo qabtay xaafada TOTAL, niman afka duuban-baa noo soo galay anaga oo tukaan fadhina, dabadeedna katiinado ayay nagu xidheen, saddex saacadood ayay meel dhaxan ah nagu hayeen, markii dambana way na xidheen, intii aanu xidhnayn wax su’aal ah oo lana waydiiyay ma jirto, ciidanka na xidhayna waa kuwa isku sheega RRU-da”

Maxamed Yuusuf Cabdilaahi, ayaa isaguna sheegay  “Aniga waxa la iga soo xidhay xaafada TOTAL, waxaanan xidhnaa muddo laba habeen ah, intii aanu xidhnayna jidh dil ayaa lanagu sameeyayay oo  inaanu kaadino ayaa lanoo diiday, Moobiladii, gogoshiina meel aanu u raacnoo ma garanayno, maanta ayuunbay nagu yidhaahdeen guryihiin qabta, sababta lanoo xidhay ma garanayno, laakiin waxay na moodayeen qolada argagixisada ah”ayuu yidhi.