Danjire Maxamed Cali Nuur: Waraaqihii Lahaanshaha Dhulka Safaaradda Soomaaliya Waa Nalagu Soo Wareejiyey

Danjire Maxamed Cali Nuur (Ameeriko)

Nairobi (RBC) Danjiraha Soomaaliya ee wadanka Kenya Maxamed Cali Nuur “Ameeriko” ayaa sheegay in shalay [Jimce] lagu soo wareejiyey waraaqaha lahaanshaha dhulka safaaradda Soomaaliya ee magaalada Nairobi kaasoo muddo dheer dacwad ay ka taagneyd ka dib markii sida la sheegay dhulkaasi uu si khalad ah u iibsaday nin ganacsade Hindi ah sanadkii 1995.

Danjire Maxamed Cali Nuur “Ameeriko” ayaa raadiyaha VOA u sheegay in maxkamadda Kenya iyo guddiga dhulka ay si rasmi ah ugu soo wareejiyeen dukumintiyada lahaanshaha dhulka taasoo muujineysa in mulkiyada dhulkaasi ay tahay hanti ummadda Soomaaliyeed ay leedahay wixii hadda ka dambeeya.

“Guddiga dhulka ee dalkan Kenya ayaa si rasmi ah noogu soo wareejiyey waraaqihii lahaanshaha dhulka, sanadkii 2012 ayaa dhulkanaloo xukumay laakiin hadda sharciyadii rasmiga ahayd oo naga maqnaa ayaa naloo keenay.” ayuu yiri danjire Ameeriko oo sheegay inuusan fileynin in wax dacwad kale ah ay ka daba iman doonto dukumintiyada la siiyey.

Mudo ka badan saddex sano ayay qaadatay dacwadda dhulka safaaradda Soomaaliya ee Kenya ka dib markii nin ganacsade Hindi ah oo degan Naitobi uu sheegtay inuu dhulka safaaradda ka iibsaday nin horey danjirihii Soomaaliya ee safaaradda Kenya u ahaa kaasoo si tuuganimo ah dhulkaasi ummadda Soomaaliyeed leedahay lacag yar ku iibsaday iyadoo looga faa’ideystay buruburkii dawladii dhexe ee dalka.

Dawacwada lahaanshaha dhulka oo gaartay dhowr maxkamadood ayaa ugu dambeyntii sanadkii 2012 waxay maxkamad ku taalla Nairobi xukmisay in dhulka ay leedahay dawlada Soomaaliya isla markaana aan la iibsan karin. Hase yeeshee waxaa tan iyo xilligaasi weli dib u eegis lagu wada dukumintiyada oo shaay oo Jimce ahayd 22/02/2013 ugu dambeyntii waraaqihii dhulka lahaanshihiisa lagu wareejiyey masuuliyiinta safaaradda Soomaaliya.

RBC Radio

Use Facebook to Comment on this Post